+0 به يه ن

فاعلاتن فاعلاتن فاعلاتن فاعلن

ايران‌ين من جانلي بئيني، بئينين ده جانييام،

آذرستان مُلكونون بير چاغلايان عمّانييام.

دينيم اسلامدير منيم، قرآني رهبر قيلميشام،

ان گؤزل يول سئچميشم انسانليغين وجدانييام.

قلبيم آولاندي ازل گوندن مغان قيشلاغينا،

بو ائلين، بو ملّتين بير دوشگونو، حيرانييام.

+0 به يه ن

اردبيل شهري آذربايجانين ان قديم مدنيت مركزلريندن، ايرانين مشهور تاريخي شهرلريندن بيري دير. بو شهر تورك‌لرين ان قديم يورد- يووالاريندان اولوب، بير چوخ جهت‌لردن اؤزونه مخصوص‌لوغو، اهاليسي‌نين انساني كيفيت‌لري و عمومي جاذبه‌دارليغي ايله آدام‌لاري هميشه اؤزونه جذب و حيران ائتميشدير. حسين دوزگونون ده بو شهري سئومگي، اونا محبت بسله‌مگي و اردبيله اوركدن باغليليغي تصادفي دگيل‌دير. لاپ‌دا دوغما و طبيعي‌دير. اونا گؤره‌كي او، ننه طرفيندن اردبيللي اولوب، اونون آناسي، محرم خانين اوغلو عباس‌قلي‌خانين قيزي‌دير. عباس‌قلي خان اصلاً اردبيلين ان مشهور و مركزي محله‌لريندن بيري يعني «پير عبدالملك» (= پيره‌دمليك) محله‌سيندن‌دير كي مشروطيت دُورونده تبريزين «زه‌ره‌نه» كندينه كؤچموشدور.

+0 به يه ن

قالاقاباغ‌ـيندا بايرام ائتديلر،

شاه باغي يا ساري هامي يورودو.

قالاني ييخماغا امر گلميشدي،

اطرافي توپ توفنگ اهلي بورودو.

بوگون توپلانتي وار، ييغينجاق واردير،

بير ياني بايرامدير، ياسدير بيرياني.

بير گون بوردا ائللر قالا تيكديلر،

بوگون قويماييرلار قالسين نشاني!

+0 به يه ن

ملت آييلاجاق دئميشديم سنه،

انتقام آلاجاق دئميشديم سنه.

شاهليغين قصري‌نين يئددي رُكنونه

زلزله سالاجاق، دئميشديم سنه.

هئي دئييرديم كيمسه دؤزمز بو داغا،

سينمارام، دوشه‌‌رم يئني نؤوراغا.

ان يئتگين نسليميز قالخيب آياغا

غلبه چالاجاق، دئميشديم سنه.

+0 به يه ن

قرآنا، اسلاما، لبيّك دئميشم،

ذروه‌يه قالخميشام اوجا اردبيل!

اينان چئينتمه‌رم نامرد يادلارا،

مقدس قوجاغين قوجا اردبيل.

سنين بيرجه اوغلون شيخ صفي الدين،

يئتر دنيا قده‌ر فخردير، شرف.

ايز سالميش سايين‌[1]دانسميان‌[2]ـا ساري،

حكم ائتميش دنيايا سيواس‌[3]ـاطرف.

+0 به يه ن

خبر: « اردبيلده حكم سورن ساواك جلّادي،

بندر عباسدا اؤلدورولدو.»

بوگون اؤلمه‌گيني ائشيتديم سنين،

گول- چيچك پايلاديم اردبيل‌ده من.

بير لكه سيليندي تبريز اوزوندن،

راحت نفس چكدي بو آنا وطن.

توپراقلارا دوشدو، سريلدي يئره،

اردبيله ديوان توتان بير جلاد. 

آدسيز- عارسيز اولموش، ولاكن قويموش

اؤزوندن سونرا بير رذالتلي آد.

+0 به يه ن

نه‌دن سن بو قده‌ر توتقونسان كؤنول،

كيمسه آچا بيلمير سنين عيني‌ني.

اگر سئوگيلي يار وفا قيلمادي،

سن ده آيري دولان، آت بو سئوگيني.

عشقي ساتدين پولا، اوتانان سن‌سن،

اؤزونه گله‌جك سني كوسدورن.

انتباه گونونده، سن اولماياندا،

گؤره‌جك نه دُرّي وئريبدير الدن.

+0 به يه ن

قيزيم! بو دُنيادير كئچيب گئده‌جك،

ياخشيليق يامانليق بوتون اؤته‌جك،

اوره‌ك‌سيز ياشايان اميدسيز اولار،

اميدده حياتين گولو بيته‌جك.

قيزيم سحر اولدو، پنجره‌ني آچ،

سيجاق گولوشلرين حياتيما ساچ،

كپنك‌لر قونوب گوللر اوستونه،

اونلارين آردينجا بو باغلاردا قاچ!

+0 به يه ن

«سحر» آد قويموشلار سنه تبريزده

باشيندا دان يئري سؤكولسون دئيه.

قارا ساچلاريني اوخشادين بيزده

آغ اوزونه شَوه تؤكولسون دئيه.

ساچين رنگ آلميشدير او زيل قارادان،

شفقي گؤيلرده گئجه بوغاندا.

ملاحت چؤكموشدور اوزونه بوتون،

اردبيللي آنان سني دوغاندا.