+0 به يه ن

فاعلاتن فعلاتن فع‌لن

آچ قولاقلاريني دينله من يار،

عشقينه بير داها ائيله اقرار.

اولو اجداديميزين ميراثيدير،

بو دني[1]تاپدالايان تورپاقلار.

هر بلايه سينه‌ني گردين سن،

مُلكه وئردين يئني بير استقرار.

+0 به يه ن

مستفعل فاعلات فع‌لن

يار گئتسه كنار، ديار قالماز،

قالماسا ديار، يار قالماز.

يوردون شرفين ايتيرسه كيمسه،

ناموس، شرافت، عار قالماز.

جمع اولسا گر اردبيل و تبريز،

آشفته بو روزگار قالماز.

+0 به يه ن

فاعلاتن فعلاتن فعلاتن فعلن

تاكي بو جسم و تنيمده نفسيم وار منيم،

او قاشين طاقينا دلبر هوسيم وار منيم.

توركم آت اويناداراق فضل و صفا پايلاميشام،

ياركنددن وين ـه ساري سسيم وار منيم.

اؤتوكن‌ده يئني سئي،[1] ملك عجمده اترك،

ملك آذرده كوروم وار، ارس ـيم وار منيم.

+0 به يه ن

اردبيللي خطيب و فلسفه چي شاعر

«سيد جعفر موسوي صفوي زاده» يه هديه.

مفاعلن فعلاتن مفاعلن فعلن

عجب يئريندن ائديبدير او شوخ غزاله سني،

كه جومدوروبدو درين فلسفي خياله سني.

حيات گئرچگي‌نين اول گول اوزلو جيراني،

غزالِ ظن و خياله ائديب حواله سني.

قاميشليغين قاميشي مثلي وصل آختاراراق،

سينر[1] فغانه گتيرميشدير آه و ناله سني.

+0 به يه ن

مفاعيلن مفاعيلن مفاعيل

نگاريم! هيكلين جاندان يارانميش،

سنين جسمينده شوخ جانان يارانميش.

وجودون صفحه- صفحه آيت حق،

الاهي وحي‌دن انسان يارانميش.

بويا هئچ يوخدور اول نازك بدنده،

قارادان آغ، قارا آغدان يارانميش.

+0 به يه ن

فاعلاتن فاعلاتن فاعلاتن فاعلن

ايران‌ين من جانلي بئيني، بئينين ده جانييام،

آذرستان مُلكونون بير چاغلايان عمّانييام.

دينيم اسلامدير منيم، قرآني رهبر قيلميشام،

ان گؤزل يول سئچميشم انسانليغين وجدانييام.

قلبيم آولاندي ازل گوندن مغان قيشلاغينا،

بو ائلين، بو ملّتين بير دوشگونو، حيرانييام.

+0 به يه ن

اردبيل شهري آذربايجانين ان قديم مدنيت مركزلريندن، ايرانين مشهور تاريخي شهرلريندن بيري دير. بو شهر تورك‌لرين ان قديم يورد- يووالاريندان اولوب، بير چوخ جهت‌لردن اؤزونه مخصوص‌لوغو، اهاليسي‌نين انساني كيفيت‌لري و عمومي جاذبه‌دارليغي ايله آدام‌لاري هميشه اؤزونه جذب و حيران ائتميشدير. حسين دوزگونون ده بو شهري سئومگي، اونا محبت بسله‌مگي و اردبيله اوركدن باغليليغي تصادفي دگيل‌دير. لاپ‌دا دوغما و طبيعي‌دير. اونا گؤره‌كي او، ننه طرفيندن اردبيللي اولوب، اونون آناسي، محرم خانين اوغلو عباس‌قلي‌خانين قيزي‌دير. عباس‌قلي خان اصلاً اردبيلين ان مشهور و مركزي محله‌لريندن بيري يعني «پير عبدالملك» (= پيره‌دمليك) محله‌سيندن‌دير كي مشروطيت دُورونده تبريزين «زه‌ره‌نه» كندينه كؤچموشدور.

+0 به يه ن

قالاقاباغ‌ـيندا بايرام ائتديلر،

شاه باغي يا ساري هامي يورودو.

قالاني ييخماغا امر گلميشدي،

اطرافي توپ توفنگ اهلي بورودو.

بوگون توپلانتي وار، ييغينجاق واردير،

بير ياني بايرامدير، ياسدير بيرياني.

بير گون بوردا ائللر قالا تيكديلر،

بوگون قويماييرلار قالسين نشاني!

+0 به يه ن

ملت آييلاجاق دئميشديم سنه،

انتقام آلاجاق دئميشديم سنه.

شاهليغين قصري‌نين يئددي رُكنونه

زلزله سالاجاق، دئميشديم سنه.

هئي دئييرديم كيمسه دؤزمز بو داغا،

سينمارام، دوشه‌‌رم يئني نؤوراغا.

ان يئتگين نسليميز قالخيب آياغا

غلبه چالاجاق، دئميشديم سنه.

+0 به يه ن

قرآنا، اسلاما، لبيّك دئميشم،

ذروه‌يه قالخميشام اوجا اردبيل!

اينان چئينتمه‌رم نامرد يادلارا،

مقدس قوجاغين قوجا اردبيل.

سنين بيرجه اوغلون شيخ صفي الدين،

يئتر دنيا قده‌ر فخردير، شرف.

ايز سالميش سايين‌[1]دانسميان‌[2]ـا ساري،

حكم ائتميش دنيايا سيواس‌[3]ـاطرف.