+0 به يه ن

«حسين دوزگون»ون شعرلري، شاعرين اؤز سسي ايله.

دانلود اشعار «حسين دوزگون» با صداي خود شاعر.

حجم: 1 مگابايت (قابل پخش در كامپيوتر)

DOWNLOAD

+0 به يه ن

آنا!

گئيدين كفن اوغلونلا بيرليكده،

گئديب سنگرده ياتدين قيش گۆنۆنده شانلي تبريزده.

دئدين:

«- گئتسين بۆتۆن شاهلار

عدالت بايراغي گؤيلرده يۆكسلسين،

امام گلسين!

امام گلسين!»

دۆشنده يئرلره شمشاد قدّي اوغلوون، بيردن

دئدين:

« - جلاّد وور من ده اؤلۆم گؤرسۆن وطن!»

ووردو، سني جلاّد قارشيندان.

ييخيلدين اوغلوون يانيندا جان وئردين.

+0 به يه ن

 (ائل قوشمالاري اساسيندا)

بويانا قاشديم تۆتۆندۆ

اويانا قاشديم تۆتۆندۆ.

آغ آلمالار بوتوندو!

آغ آلمانين ساچاغي،

اليمي كسدي پيچاغي.

ياغ گتيرين ياغليياق،

دستمال گتير باغليياق!

دستمال دوه بوينوندا،

دوه مغان يولوندا.

مغان يولو سر به سر

ايچينده بير قيز گزه‌ر.

قيز دانيشدي قاشيله

آلديم دوغا آشيله!

+0 به يه ن

تبريزين اركي نين آياغي آلتيندا

اردبيلدن گلن گؤزل بير جوان

سريلدي يئره.

ايكي آغ گؤيرچين

باشي اۆستۆنده

قوپدو اركين سؤكۆك- تؤكۆك بؤيرونه.

بيري دئدي:

-  باجي!

باشقاسي سؤيله‌دي:

- باجي! جان باجي!

+0 به يه ن

بير آن سن سوسمادين، من نئجه سوسوم

منيم آناجيغيم، منيم تانريچام!

ساوالان سويونو ايچيرتدين منه

عشق اولسون آناجان حلال سۆتۆنه!

حياتين اليندن تاپسام آمان، من

قاچاجاغام يئنه سنين قوينونا.

+0 به يه ن

قارداشيم بوشلا بو بوش سؤزلريوي

منه تبريزلي دئييرلر، البت!

اردبيل شهري ده عرفان يوردوم،

معبديم، قبله‌گاهيم، جانيمدير،

نه تفاوت ائده‌جكدير من اۆچۆن؟

وطنيم، آذربايجانيمدير!

يادا اويما، سنه يانماز اۆره‌گي

سني تحقير ائله‌ييب آلچالدار.

تبريزين تاريخينه خورباخميش،

قاييديب باشيوا چيرپار قاپازي.

اونون اؤز خاصيتين من بيليرم،

اۆستۆوه دؤنده‌رجكدير آرازي.

+0 به يه ن

اردبيل شهرِ فضيلتدي شرف

گلمه اي خصم تميز يوردا طرف،

وطنيمدير، بؤيۆك ايرانيمدير!

هئچ زمان دشمن اؤنۆندن قاچماز

ائللرين خصمينه قوينون آچماز،

بير صداقتلي نگهبانيمدير.

وطني دشمنه ساتماز سن تك،

اورادان قالخدي شرفلي بابك

ملّي عهديم، اولو پيمانيمدير.

+0 به يه ن

نه‌يي سوروشورسان گؤزه‌ليم مندن

سوروشما، سوروشما،

                   بسدير،

                             بونو بيل:

سورغونا بير جواب وئرميه‌جگم!

سوروشما، اۆره‌گيم قوي راحاتلاسين،

بلكه سوسغونلوغوم سبب اولسون كي

ساوالان باشيندان گنج اۆره‌كلره

وحي‌لر آخيشسين، الهاملار گلسين،

فيرتينا قاورانسين، توفان پارتلاسين.

تهران - 1350

+0 به يه ن

اۆره‌گيم سيخيلير

                   آنا!

بو آخشام،

قوجاغينا ساري گلمك ايستيرم

اته‌گيندن اؤپم، اليندن اؤپم!

+0 به يه ن

بو گئجه آغلاماق

          ايسته‌ييرم من،

بيلميرم اۆره‌گيم

          توتقوندور نه‌دن.

اوشاقليق حسره‌تيم

          اردبيل‌ده‌دير،

دۆنندن بو گۆنه

          هي گلير، گئدير.