0
باخیش
دوشنبه 14 اسفند 1391
احسن
+0 به يه ن

خبر: « اردبيلده حكم سورن ساواك جلّادي،

بندر عباسدا اؤلدورولدو.»

بوگون اؤلمه‌گيني ائشيتديم سنين،

گول- چيچك پايلاديم اردبيل‌ده من.

بير لكه سيليندي تبريز اوزوندن،

راحت نفس چكدي بو آنا وطن.

توپراقلارا دوشدو، سريلدي يئره،

اردبيله ديوان توتان بير جلاد. 

آدسيز- عارسيز اولموش، ولاكن قويموش

اؤزوندن سونرا بير رذالتلي آد.

0
باخیش
دوشنبه 14 اسفند 1391
انتباه گونو
+0 به يه ن

نه‌دن سن بو قده‌ر توتقونسان كؤنول،

كيمسه آچا بيلمير سنين عيني‌ني.

اگر سئوگيلي يار وفا قيلمادي،

سن ده آيري دولان، آت بو سئوگيني.

عشقي ساتدين پولا، اوتانان سن‌سن،

اؤزونه گله‌جك سني كوسدورن.

انتباه گونونده، سن اولماياندا،

گؤره‌جك نه دُرّي وئريبدير الدن.

0
باخیش
دوشنبه 14 اسفند 1391
قيزيم
+0 به يه ن

قيزيم! بو دُنيادير كئچيب گئده‌جك،

ياخشيليق يامانليق بوتون اؤته‌جك،

اوره‌ك‌سيز ياشايان اميدسيز اولار،

اميدده حياتين گولو بيته‌جك.

قيزيم سحر اولدو، پنجره‌ني آچ،

سيجاق گولوشلرين حياتيما ساچ،

كپنك‌لر قونوب گوللر اوستونه،

اونلارين آردينجا بو باغلاردا قاچ!

0
باخیش
دوشنبه 14 اسفند 1391
سحر
+0 به يه ن

«سحر» آد قويموشلار سنه تبريزده

باشيندا دان يئري سؤكولسون دئيه.

قارا ساچلاريني اوخشادين بيزده

آغ اوزونه شَوه تؤكولسون دئيه.

ساچين رنگ آلميشدير او زيل قارادان،

شفقي گؤيلرده گئجه بوغاندا.

ملاحت چؤكموشدور اوزونه بوتون،

اردبيللي آنان سني دوغاندا.