+0 به يه ن

اردبيل شهرِ فضيلتدي شرف

گلمه اي خصم تميز يوردا طرف،

وطنيمدير، بؤيۆك ايرانيمدير!

 

هئچ زمان دشمن اؤنۆندن قاچماز

ائللرين خصمينه قوينون آچماز،

بير صداقتلي نگهبانيمدير.

 

وطني دشمنه ساتماز سن تك،

اورادان قالخدي شرفلي بابك

ملّي عهديم، اولو پيمانيمدير.

 

گيرمه، كيرلتدي وجودون سويونو

درده درمان ياراديب خالق اونو

او طبيبيمدير، او لقمانيمدير.

 

عزّتيم، تاريخيم، عاريمدي منيم

افتخاريمدي، مداريمدي منيم،

باب عالي، اولو ايوانيمدير.

 

خالچاسين، چيني خاناسين چالدين

سر به سر مُلكۆمۆ ييخدين، آلدين!

وارث اولما، او منيم كانيمدير!

 

اوتان! آياتِ مخالف اوخوما،

اردبيل‌دن كي چكيلمز مولا.

مذهبيم، آيه‌ي قرآنيمدير.

 

دُنيا چئيننسه ده، اول چئيننمز

كيمسه‌ده وارليغين انكار ائده‌مز،

اردبيل بير اولو برهانيمدير.

سن اونا پيس يازاسان دا، نه غميم؟

معبدي ايچره ياتيبدير عليم

او منيم دهرده امكانيمدير.

 

تبريزين قاني تميز ياوروسويام

سن دئيندن دگيلم، بلكه بويام!

اردبيل ايلك دبستانيمدير!