+0 به يه ن
فاعلاتن فعلاتن فعلاتن فعلن
ايسترم غِيرته گلميش يئني انسان اولاسان،
بو يازيق ملّتيمين دردينه درمان اولاسان.
اؤزۆنه بير گلهسن، فخر ائليم قامتينه،
خوبلر ايچره گزيب سرور خوبان اولاسان.
گۆنشه يۆكسله بؤركۆم اوجو شيرازلي كيمي،
سن كُلاهيمدا منيم دُرّ درخشان اولاسان.
آچاسان صورتيني پردهي منحوسيندن،
بو قارانليق گئجهميزده مه تابان اولاسان.
قارا توپراقلار اۆزۆندن دورا شمشاد قدين،
يئنه ده مملكت جمشيده خاقان اولاسان.
اردبيلدن اوجاليب
شاه ختايي كيمي سن،
فرمانين جاري ائديب تبريزه سلطان اولاسان.
او بويون قربانييام بير گلهسن محفليمه،
گۆللر ايچره سۆزۆلن سرو خرامان اولاسان
قيراسان خلقين آياغيندان اسارت ايپيني،
دۆزگۆن ـۆن باشين اوجالدان يئني انسان اولاسان.
1357