+0 به يه ن

اردبيللي خطيب و فلسفه چي شاعر

«سيد جعفر موسوي صفوي زاده» يه هديه.

مفاعلن فعلاتن مفاعلن فعلن

عجب يئريندن ائديبدير او شوخ غزاله سني،

كه جومدوروبدو درين فلسفي خياله سني.

حيات گئرچگي‌نين اول گول اوزلو جيراني،

غزالِ ظن و خياله ائديب حواله سني.

قاميشليغين قاميشي مثلي وصل آختاراراق،

سينر[1] فغانه گتيرميشدير آه و ناله سني.

گئجه- گونوز نيازيمدير الاهِ منّاندان،

زمانه جايناغي اوغراتماسين زواله سني.

تميز خميره‌ن ايچينده سئچيب درين يئتنك،[2]

يئتيردي ياخشي او علّامه‌ميز[3] كماله سني.

رياسي زاهدين آلداتمادي، عجب قيلدي،

فضولي ايله نسيمي‌له هم‌پياله سني.

ديار غيره گر اولسان دا وصله‌ي ناجور،

بو يوردا، بو وطنه باغلاييب قباله سني.

سن اي خطيبِ وطن، خصم حجتّين سيندير،

او سالدي باسغينا،[4] هجره مني، ملاله سني.

گون ائيله گون، وطن اؤيله وطن اولاكي گؤره‌م،

سوسوز بو يوردومون اوستونده بير شلاله[5] سني.

حقيقت آختاران اجداد پاكيميز حقينه،

اِلاهدان ديلرم چاتديرا جلاله سني.

ائده بو يازغيسي[6] اسوَد غريب ملّتيمين،

كئچن تواريخينه جانلي بير رساله سني.

اپوش[7] نسلي‌نين ايللرجه تند بادينده،

گونشلي يوردوما بيرده بئجرده هاله سني.

سن ايندي قسمته باخ دوزگون، ايشلري سِير ائت،

حواله ائيله‌ميشم من‌ده بير خياله سني!

تهران - 1364